KALIBO, Aklan—Nagpanawagan eon ro mga tricycle drivers byaheng Bulcampus sa lokal nga gobyerno it Numancia nga mataw-an it igtaeopangod ro ginapangatubang nga problema sa sektor it transportasyon.
Raya hay kasunod sa panibag-ong pagsaka sa presyo it petrolyo nga ginpatuman kahapon nga adlaw it Martes.
Suno kay Romy Palmon, presidente it Bulcampus nga mabahoe nga paeas-anon nanda ro uman nga pagsaka sa presyo it langis kon siin suno sa ibang mga driver/operator hay base magatuga raya it pag-untat sa andang pagbyahe kon uwa it aksyon nga igata-o ro gobyerno sa andang sektor.
Inde man sigon sanda basta-basta nga makapataas it pamasahe bangud nga nagakinahang-ean raya it public hearing.
Ginpahayag dugang ni Palmon nga ro insigidang tikang nga andang ginhimo hay ro paghinyo sa pasahero nga madugangan it limang piso ro andang pamasahe sa ap-at ka pasahero nga sakay it tricycle.
Apang, kon inde magsugot hay uwa suno kana sanda nagapilit bilang respeto eon man sa andang kinamatarong bilang commuters.
Nag-apela raya sa mga sumaeakay nga maghueogan eon lang it abaga ro magtimbang nga parte para sa kamaeayran it tanan.
