KALIBO, Aklan–Uman nga ginpadumdom it Department of Social Welfare and Development ukon DSWD nga uwa it walk-in nga pagabatunon sa nakataeana nga pay-out it educational assistance sa adlaw it Sabado.
Suno kay Beverly Salazar it DSWD Aklan, kon uwa it confirmation pinaagi sa text messages ukon email hay inde eon magpilit nga mag-adto sa pay-out center bangud nga mauyang eamang ro andang oras.
Sa adlaw it sabado suno kana hay kapin sa 301 nga kliyente maghalin sa nagkaeain-eain nga banwa sa probinsya ro andang iga-cater ag sambilog eon lang ro nabilin nga pay-out site sa ABL Sports and Cultural Complex sa banwa it Kalibo.
Ginsarado eon sigon ro pay-out center sa banwa it Banga ag Ibajay kon siin ro mga una sa masterlist nga uwa nakaadto ko mga nagtaliwan nga sabado eabi eon ro mga may kueang sa requirements hay sa ABL Sports Complex eon lang sanda magdiretso.
Aminado ro ahensya nga bumuhos ro mga nagparehistro online nga nagapasimpalad nga makabueo it ayuda nga hasta sa makaron hay uwa gihapon nakabaton it confirmation text messages.
