KALIBO, Aklan — Bangud nga owa pa nakakabangon ro iba pang tourist destination sa nasyon nga gindaeasa it bagyong Odette, ginaeauman nga sa Boracay magabuhos ro kaabuan sa mga dumueuong nga turista nga magasueod sa Pilipinas umpisa sa Pebrero 10.
Angot kara, ginpahayag ni Kalibo International airport manager Engr. Eusebio Monserate, Jr. maskin nga owa pa nagabukas ro mga flights halin sa mga nasyong China, South Korea, ag Taipei haum eon ro mga tawuhan it paeuparan.
Nauna kara, ginhaeugaan it gobyerno probinsiyal ro mga travel restrictions.
Magabuhi-on sigon it bag-ong guidelines ro ekonomiya ag turismo sa Aklan kaibahan eon ro Isla it Boracay kasunod it krisis tuga it COVID-19.
Ro mga fully vaccinated tourist hay kinahangean nga magpakita it andang mga vaccination card ukon certificate nga gin-isyu abroad para makasueod sa probinsiya. Ro mga partially ukon mga owa pa nababakunahan hay kinahangean nga magpakita it negative result it swab test sa sueod it 72 oras antes ro departure.//
Samtang, ginapatuman it Kalibo airport ro ‘no vaccine, no entry’ policy para sa mga empleyado kara ag iba pa nga nagasueod sa airport. Ginapatuman sa gihapon ro pagsuksok it face mask ag ro social distancing agud nga malikawan ro pagkalhit it COVID-19.
Nasayuran nga ko Enero hay nakalista it 35,799 nga mga turista ro Isla it Boracay nga mas manaba kumpara kat owa pa it pandemya. Ko nagtaliwan nga 2021 hay bumagsak sa 325,000 ro numero it mga turista kumpara sa 2 million ko dag-on antes ro pandemya.
