KALIBO, Aklan — Agud nga mabatyagan it tanan nga mga preso ro kasadyahan sa nagahilapit nga selebrasyon it Paskwa, mas pa nga pagapaeaparon it Bureau of Jail Management and Penology (BJMP) Aklan ro andang e-Dalaw System.
Suno kay JO2 Jovelyn Ignor, administration officer it nasambit nga jail facility nga tuyo it nasambit nga programa nga mataw-an it kahigayunan ro andang mga persons deprived of liberty (PDLs) nga maka-istorya pinaagi sa video call ro andang mga mahae sa kabuhi nga idtu sa mga maeayo nga lugar ag indi makabisita.
Pinaagi sa e-Dalaw kun sa siin nagagamit it computer internet video call hay nahimo nga maka-istorya ag makita it mga preso ro andang mga himata ag pamilya maskin siin nga parte it nasyon ukon sa abroad.
Ginklaru man nana nga padayun ro andang pagbaton it mga bisita ukon face to face dalaw kada adlaw it Martes hasta Huwebes umpisa ala-1 it hapon hasta alas-4 it hapon ag bilog nga adlaw kada Sabado ag Domingo agud nga maka-ibahan it mga PDLs ro andang mga mahae sa kabuhi.
Sa pihak nga parte, ginpahayag dugang ni JO2 Ignor nga may pilang indibidwal ag grupo eon ro nagpahayag it interes nga magapatigayon it gift giving sa mga PDLs sa masunod nga mga inadlaw .
Samtang, padayun ro pag engganyo it BJMP Aklan nga suportahan ro livelihood project it mga preso pinaagi sa andang mga gina-obra nga nagkaeain-eain nga klase ag disenyo it mga parol makaron nga tiempo it Paskwa.
Pwede sigon nga magpadaea it orders sa official Facebook page it BJMP Aklan ukon mag-agto sa andang taeatapan.
Ginahimo eon sigon it mga PDL ro mga parol bilang kaparte it andang regular nga pangabuhian kada Kapaskwahan agud nga makaangkon sanda it paeangitan-an para sa andang mga pamilya.
Samtang, igabutang sa red alert status ro andang presuhan sa Paskwa ag Bag-ong Dag-on agud nga mag alalay sa tanan nga mga magabisita sa jail facility.
