KALIBO, Aklan — Padayun nga gina-obserbahan sa Aklan Provincial Hospital ro sangka eaeaki matapos bun-on it naka-alitan nga tiya bandang alas-8:30 gabi-i it Domingo, Oktubre 20, sa Sito Bato, Barangay Fatima, New Washington.
Nakilaea ro biktima nga si Jestoni Icagan, 21-anyos, nga insigida nga gindaea sa ospital pagkatapos it pagbuno kana it anang kaugalingon nga tiya nga si Emelita Zita, sangka miyembro it LGBT community ag parehong residente it nasambit nga lugar.
Pareho sigon nga hilong ro magtiya kat matabu ro krimen.
Suno kay P/Executive Master Sgt. Fe Rebaño, tagapaghambae it New Washington Municipal Police Station nga samtang naga-inuman, nakaaangkon it diskusyon ro magtiya sa baeay it andang kaeapit hasta nga gin-eampusan it plastic nga bangko it biktima ro anang tiya. Insigida man nga nagbaeos ro suspek pinaagi sa pagbo-oe it kitchen knife sa anang kilid ag ginbuno ro anang gumankon it makapilang beses kun sa siiin nakaangkon it tatlong lastro sa anang waea nga kilid ag sambilog sa anang ilukon.
‘MAANGAS KON NAKA-INOM’
Suno sa suspek nga si Emelita, ginsita eamang nana ro anang gumankon nga hilong eon bangud nga maangas raya nga nakikipag-istorya sa andang sambilog pang kainuman nga sangka menor de edad nga eaeaki.
Pahapyaw sigon nana nga gindukoe ro anang gumankon, kun sa siin gulpi raya nga nagguwa ag nagbo-oe it monoblock nga bangko nga gin-eampos kana nga pilit nana nga ginsinagang.
Sakit suno kana sa ueo ro anang gumankon bangud nga barkador, pirmeng hilong ag kon amat hay nagatuga pa it gulo.
MABUHAY EON NGA MAY OWA PAGKA-ILINTINDIHAN
Base sa imbestigasyon it kapulisan, mabuhay eon nga owa it pagka-ilintidihan ro magtiya. Bago matabu ro insidente, naakig ro tiya matapos nga gin-angasan it biktima ro anang bisita samtang naga-inuman sandang tatlo.
Dugang pa nana nga makabig nga self-defense ro ginhimo rason nga nabun-an ro anang gumankon.
Dugang pa it suspek nga matapos ro insidente hay nag-uli imaw sa andang baeay sakay it anang motorsiklo kaibahan ro anang bisita. Maangan-angan hay nag-abot sigon ro kapulisan nga nag-aresto kana, kun sa siin narekober sa suspek ro kutsilyo nga ginamit sa krimen.
Aminado man si Emelita nga naghinoesoe man imaw sa anang gin-obra.
Nakakulong makaron sa custodial facility it New Washinton PNP ro suspek ag magapangatubang sa reklamong frustrated homicide.
