KALIBO, Aklan—Nagpanawagan ro sangka misis sa anang mister nga magsurender eon ag atubangon ro krimen nga anang nahimo.
Raya ro pahayag ni Mercy Dalida Tacas, live-in partner it suspek nga si Ronito Bueta, alyas Banana, 40-anyos tumandok it Masbate ag presenteng naga-istar sa sangka farm sa Carillo Road, Brgy. Linabuan Norte, Kalibo nga ginaturo nga nagbuno-patay sa anang bilas nga si Jonas Miranda, 36-anyos, tubong Bacolod City ag residente man it nasambit nga lugar.
Ginpahayag nga antes ro insidente hay nakaangkon anay it diskusyon ro biktima kay certain Gary Mundia sa katung-anan it andang inuman sa birthday party it anang kamanghuran nga unga, bandang alas-9:35, gabi-i it domingo, Abril 21 sa nasambit nga lugar.
Suno kay Tacas nga gulpi eamang nga nagtindog si Miranda ag ginpatay ro videoke sa tuyo nga magka-ilintindihan sanda it anang kadiskusyon nga si Mundia.
Apang ginkaakig sigon raya it suspek sa pagpati nga ginpatyan imaw it videoke samtang nga nagasaot ag nagakinasadya.
Kasunod kara, gintapungoe it biktima ro suspek rason nga natumba raya kaibahan ro anang live-in partner.
Kat makabangon hay nagbo-oe imaw it siyaw ag ginbuno ro biktima nga tinamaan sa waea nga parte it anang kilid.
Nadaea pa raya sa aklan provincial hospital , apang patay eon kat maka-abot bangud sa grabeng lastro nga naagum .
Padayun nga ginatugis it mga awtoridad ro nagpaeagiw nga suspek.
May narekober nga plamingko ro mga kapulisan, apang ginasugid nga bukon it raya ro murder weapon sa krimen.
