KALIBO, Aklan — Nagapadayun ro imbestigasyon it New Washington Police Station sa nasapwan nga bangkay it sangka caretaker it tangke nga naka-eub-eub sa fish pond kaibahan ro anang motorsiklo sa District 3, Brgy. Pinamuk-an, New Washington, Huwebes it aga-aga.
Ginkilaea ni P/Corporal John Lee Valencia, imbestigador it New Washington PNP ro biktima nga si Jeffrey Arcelon, 40, ag residente it nasambit nga lugar.
Base sa report, bandang alas-5:00 it aga-aga hay nakita it mag-asawang Roberto ag Elsa Ablando ro eawas it biktima.
Ro mag-asawa hay kaibahan nga caretaker sa tangke ni Arcelon.
Ginasugid nga bandang alas-9:30 ko Miyerkules it gabi-i hay gin-usoy pa it biktima sa mag-asawang Ablando kon siin ro anang misis ag ro andang mga unga.
Nasayuran nga kaeabanan nga nagalikaw ro misis it biktima kaibahan ro anang mga unga kon naga-uli nga hilong ro anang mister bangud nga nagasangag sigon raya nga nagaresulta it andang pag-away.
Ginapatihan nga owa natantiya it biktima ro anang pagliko rason nga nahueog raya sa tangke.
Self accident resulting to drowning ro ginatumod nga rason it anang kamatayon ag owa it foul play sa insidente.
