BALITANG Espesyal —- Rumesponde ro mga pulis sa sangka baeay sa Spring Hill, Florida matapos sanda nga makabaton it report halin sa 911 nga may eaeaking naga-request nga ipa-testing ro nabakae nana nga illegal nga droga agud nga masayuran kon matuod baea raya .
Pag-abot nanda sa ginasugid nga baeay, naabutan nanda ro 41-anyos nga si Thomas Eugene Colucci ag ginpakita kara ro daywang pakete it crystal-like substance ag nagsugid nga gina-alegar nga ginbaligyaan imaw it pekeng methampethamine ukon shabu.
Ginpaathag ni Colucci nga owa imaw it anuman nga nabatyagan nga “high” matapos gamiton ro droga rason nga nagtawag imaw sa mga awtoridad bangud nga gusto nana nga mapasabat ro nagbaligya kana kara .
Ko rato nga oras hay nagpaidaeum sa field test ro mga illegal nga droga ni Colucci ag nagpositibo raya sa methamphetamine.
Insigidang gin-aresto si Colucci ag ginkasuhan it possession of methamphetamine and possession of drug paraphernalia.
