KALIBO, Aklan — Nagpahayag it pagklaro sa Bombo Radyo Kalibo ro sangka owner/technican it sangka repair shop agod nga klaruhon ro anang pangaean kasunod it Facebook post nga gin-atake sigon imaw sa tagipusuon ag patay eon.
Suno kay Jonel Martelino, 36-anyos ag residente it Barangay Tigayon, Kalibo, nakibot eamang imaw kat gin-impormahan imaw it anang amo angot sa nasambitan nga post.
Ku una hay ginbalaewala na eamang raya ag ginpasensyahan ro nagpost nga nagahingaean kay Arnel Torres ag sangka tourguide sa Boracay.
Apang mas ginkaakig na eon kat ginrepost raya it uman ku nasambitan nga certain Torres.
Ginpahayag ni Martelino nga owa imaw it ideya kung ham-an it nahimo raya kana ag owa imaw kasayud kung ano ro rason kara.
May kaangtana kara, haum si Martelino nga magpasaka it kaso kontra sa suspek engkaso nga madakpan raya.
Makita sa nasambitan nga post ro litrato it tagreklamo ag ro sangka kabaong.
Ginpakamayad man kara nga iparekord ro insidente sa kalibo police station para sa nagakaigo nga disposisyon.
