KALIBO, Aklan — Nagapabilin nga buyot it mga engkanto ro eawas it 15 anyos nga si Jhuros Flores rason nga owa pa raya makita hasta sa makaron.
Raya ro ginpahayag ni Mr. Rollen Vargas, sangka spiritual healer nga mas kilaea man sa tawag nga Antingero Kumbatero.
Suno kana nga masyadong mabaskog ro tagabantay ukon taglugar nga nagbo-oe sa binatilyo rason nga maskin ano ro ginahimo nga pamaagi it mga albularyo nga nagbayanihan agud nga mabawi ro anang eawas hay mabudlay bangud sa andang paghawid nga gina-obra.
Base sa andang pagtawas, nagapakita nga ro anang eawas hay una gihapon sa buho sa idaeum it tubi nga gin-eumsan it biktima.
Samtang, gindugang pa kara nga napas-eawan man sanda kaibahan ro sangka faith healer nga taga-Iloilo nga si Kumander Berdugo nga maka-istorya ro espiritu ni Jhuros bangud sa pagbaeabag it mga bantay it lugar, kun sa siin sanda ro naga-atubang ag nakikipag-istorya sa mga espiritista.
Dugang pa nga nabudlayan man sanda nga maka usoy makaron it medium ukon tawo nga magapasugot nga gamiton ro anang eawas agud nga saniban it espiritu ni Jhuros nga pwede nanda nga maboe-an it impormasyon.
Bangud nga moderno eon suno kana ro paniempo, maabu ro owa nagapati sa andang mga ritwal nga ginahimo.
Kadungan kara, nag apela imaw nga indi eon magkomento it maeain sa andang gina-obra bangud nga sanda eamang ro nakasayod sa andang gina-obra.
Makabig suno kana nga misteryoso ro lugar nga ginpaligsan it grupo nanday Jhuros ag posibleng nadisturno nanda ro taglugar nga ginasugid nga gina-istaran it mga kataw .
