KALIBO, Aklan—Ginpaathag ni P/Col. Alexander Mariano, deputy regional director it Police Regional Office ukon PRO-6 nga ro send off ceremony it mga security contingent nga anang ginpangunahan sa Aklan Police Provincial Office sa Camp Pastor Martelino para sa Ati- Atihan Festival 2025 hay bukon eamang it pagpakita it pwersa kundi nga pagpahayag man it andang commitment agud nga magserbisyo ag magprotekta sa komunidad.
Gin engganyo it opisyal ro mga security personnel nga boe-on raya nga oportunidad agud nga ipakita ro andang best ag sanda ro may control sa sitwasyon eabi eon agud nga mapabilin ro kaeowasan ag seguridad.
Kapareho ko nagtaliwan nga Ati-Atihan Festival, ginaduso kara sa mga otoridad nga ipabilin ro “zero major crime incident” ag mapanaba ro numero it mga street crimes .
Ginlaygayan man nana ro security forces nga pirmeng maging alerto, maging kumpiyansa sa andang trabaho ag maging marespeto.
Ginaeauman nga ginatos nga mga bisita mapa-local man ukon dumueuong ag pilgrims ro magabuhos sa makaron nga selebrasyon.
