KALIBO, Aklan — Nagapadayun ro fundraising activity sa bilog nga kalibutan para sa mga naaywan nga pamilya it pitong dragon boat paddlers nga namatay, Miyerkules it agahon sa baybayon nga sakop it Brgy. Manocmanoc sa isla it Boracay.
Suno sa pahayag it GoFundMe website, eubus nga kinahangean ro pondo nga matipon para sa eubong it nasambit nga mga biktima ag pag-transport sa andang mga bangkay .
Kaabuan sa mga biktima hay naghalin sa nagkaeain-eain nga parte it nasyon ag nagatrabaho eamang sa isla.
Kaibahan sa mga namatay nga paddlers it Boracay Dragon Force team kat kumueob ro andang ginasakyan nga baroto samtang nagapatigayon it routine training hay sanday Mark Vincent Navarrete, Rose Antonette Supranes, John Vincent Natividad, Comar Acob, Richel Montuya ag ro mag-asawang Johann Tan ag Maricel Tan.
Nasayuran nga ro mag-asawang Johann ag Maricel hay may sambilog nga unga nga eaeaki nga si Joaquin.
Nauna kara, ginpasidunggan ro pitong namatay nga paddlers ko Sabado sa Singapore. Nakaangkon it sang minuto nga kalinong samtang tig-sambilog nga ginabasa ro andang pangaean antes nga gin-umpisahan ro sangka dragon boat race.
