NATIONAL News — Ginkumpirma it bodyguard ag driver ni dating Pangueong Rodrigo Duterte nga si Sanson Buenaventura sa hearing it House Quad Committee nga may kamatuoran nga ro code name it dating presidente hay ‘Superman’.
Apang ginpaathag ni Sanson nga sangka retiradong pulis nga call sign eang sa radyo ni Duterte ro Superman ag owa raya it kahilabtanan sa Davao Death Squad nga suno kana hay nabatian eang nana sa media.
Hugot man nga ginpanginwaea ni Buenaventura ro pahayag it self-confessed DDS hitman nga si Arturo Lascañas nga imaw ro nagapatuman it mga mandu ni Duterte partikular ro mga ginapatay nga mga indibidwal.
Ginpamaoibaran man ni Buenaventura ro pahayag ni Philippine Charity Sweepstakes Office (PCSO) General Manager Royina Garma nga imaw ro nagpanupod it P20,000 nga reward sa mga station commander para sa mga ginapatay nga drug suspects.
Sa pag-usisa ni Batangas 2nd District Rep. Gerville “Jinky Bitrics” Luistro kay Buenaventura, gin-ako man kara nga haum imaw nga isakripisyo ro anang kabuhi para nga masalbar si Duterte.
Bangud kara, ginpahayag ni Luistro nga kon haum si Buenaventura nga mapatay para sa anang amo, bukon man mabudlay para kana nga magpinuril para kay Duterte.
Nauna eon nga ginbulgar ni dating Senator Leila de Lima nga si Duterte kat mayor pa kato it Davao City hay ginatawag nga “Superman” it DDS.
Sa House Quad Committee Hearing ko October 22, gindetalye ni De Lima ro ginapahayag nga organizational structure it DDS kun sa siin makit-an nga “Superman” ro tawag sa pinakamataas nga lider kara.
Suno kay De Lima, raya hay base sa anang imbestigasyon sa DDS kat commissioner pa imaw it Commission on Human Rights (CHR), ag sandig mismo sa mga testimoniya it mga testigo nga anang na-interview.
