KALIBO, Aklan — Ginkumpirma it Department of Environment and Natural Resources (DENR) ro napabalitang mismong ro tag-iya it Henann Group of Resorts nga si Dr. Henry Chusuey ro naghinyo nga pasugtan sandang maka-operate samtang ginacomply ro mga kinahang-eanong dokumento para makabueo it accreditation sa Department of Tourism (DOT).
Raya hay kasunod sa ginapatigayong imbestigasyon it Boracay inter-agency task force sa nasambitang resort bangud sigon sa pekeng environmental compliance certificate (ECC).
Suno kay DENR Usec. Benny Antiporda, personal kara nga naka-istorya ro tawuhan it Henann nga nagsumiter it pekeng ECC nga insigidang nagpangayo it pasaylo.
Nalipay sigon raya matapos nga makit-an ro ECC sa anang opisina nga insigidang ginpasa sa DOT apisar nga handwritten ro petsa kabaliskaran sa nakasanayan nga ginatatak it ahensiya.
Mismong sewage treatment plant (STP) sigon ro kueang sa Henann rason nga uwa pa raya nataw-an it accreditation.
Samtang, ginpaandaman eon man nanda ro resort matapos makaabot sa andang kasayuran nga nagapa-book raya it mga turista.
Suno kay Usec. Antiporda nga pilang turista ro nagreklamo kanda matapos nga inde pag-i-refund it Henann ro kwartang ginbayad kanda.
Ro mga compliant hotels ag resorts eamang ro ginapasugtan it inter-agency task force nga magbaton it booking.
