KALIBO, Aklan—Ginapreparahan makarun it lokal nga gobyerno it Malay ro pagbukas it isla it Boracay sa mga domestic ag foreign tourists.
Suno kay Malay Mayor Frolibar Bautisa, umpisa October 1 magalunsar sanda it grand opening sa Boracay kung siin ginapasugtan eon nga makaadto sa isla ro taga-ibang rehiyon nga una sa idaeom it Modified General Community Quarantine ukon MGCQ status mag-euwas sa Western Visayas kamana man pagbaton it dumueoong turista.
Ginahueat eon lang sigon nanda ro approval it Inter-Agency task force kung iga-konsidera ro andang ginpasa nga rekomendasyon.
Ginpahayag man it alkalde nga sambilog sa andang nakasugtanan nga requirements sa mga nagasueod sa isla hay ro negatibo nga resulta it RT-PCR test.
Raya hay para masigurong euwas sa paeag it makataeapon nga sakit ro isla ag tanan nga nagabisita.
Padayun man suno kana ro pagpatuman it pilang minimum health protocol kapareho it pagsuksok it facemask, face shield ag pag-obserba it physical distancing.
Gindugang pa ni Mayor Bautista nga gina-require man sigon sa tanan nga establisyemento nga magtaeana it andang log book para sa mga costumer nga nagasueod sa andang edipisyo nga posibleng gamiton sa contact tracing engkaso nga makalista it COVID-19 infection sa isla.
Sa pagtapos it buean it Agosto, nakalista it masobra 1,200 nga indibidwal halin sa Western Visayas nga nagbisita sa Boracay.
