Gindepensahan it gobyerno it Pilipinas ro pagbisita ni Ukrainian President Volodymyr Zelensky sa nasyon halin sa mga kritiko.
Angot kara, partikular nga ginpuna ni National Security Council (NSC) Assistant Director General Jonathan Malaya ro National Democratic Front (NDF) sa pagtawag sa Pilipinas ag Ukraine bilang puppets it Amerika.
Suno kana, bilang sangka responsableng miyembro it international community ag mabakas nga nagaduso it rules-based international order, committed ro Pilipinas sa pagbulig para mawakasan eon ro giyera sa Ukraine.
Ginpunto man it National Security Council official nga ro pagpueong sa tunga nanday Pangueong Marcos ag President Zelensky hay pamatuod it padayon nga suporta it Pilipinas para sa multilateral peace efforts kaibahan eon ro panawagan it United Nation para sa pagtapos it gyera sa tunga it Ukraine ag Russia.
Madumduman nga ko Hunyo 3, nakipagkita si President Zelensky kay Pangueong Marcos Jr. sa Malacanang para hinyuon ro suporta it nasyon para sa peace summit sa Switzerland nga igapatigayon sa ulihing dominggo it Hunyo kadungan it pag-eaum nga matuldukan eon ro invasion it Russia sa andang nasyon.
