KALIBO, Aklan — Sangka grade 2 pupil ag sangka ginang ro ginpaidaeom sa exorcism matapos sigon sapian ro mga raya it maeain nga espiritu sa magkaseperadong insidente sa isla it Boracay.
Suno kay Fr. Jose Tudd Belandres, parish priest it Our Lady of the Most Holy Rosary Parish sa isla ag kilaeang exorcism priest sa probinsya it Aklan, ginasapian sigon ro ongang babaye it inde makit-ang nilalang ag ginahutikan nga uwa it maeain sa pagpakamatay ukon pag-suicide.
Gintaw-an man sigon nanda it psychological advice ro onga kat masayuran nga gina-bully raya sa andang eskwelahan.
Sa pihak nga parte, ginpahayag ni Fr. Tudd nga eubus imaw nga nabudlayan sa ginpatigayong exorcism sa sangka 25-anyos nga ginang bangud nabatyagan nana ro mabaskog nga presensiya it maeain nga espiritu.
Nagawala sigon nga matsa ginakatay nga baboy ro ginang kat daehon sa simbahan kon siin nasarangan it anang kakusog ro tatlong eaeaking nagahawid kana.
Kat mahimasmasan hay nagguwa ro minatuod nga hitsura it misis nga sangka gwapa ag maputing babaye.
Samtang, suno sa pari nga masami sa mga ginasapian it maeain nga espiritu ro mga tawong uwa nagasimba ag nagapangamuyo.
