KALIBO, Aklan — Bangud sa sawa, naka-experiensiya it haeos limang oras nga blackout ro bilog nga probinsiya it Aklan ko Sabado, Hunyo 22, mag-eowas sa Caticlan, Malay ag bilog nga isla it Boracay.
Suno kay Engr. Joel Martinez, general manager it engineering department it Aklan Electric Cooperative (Akelco) ro pagsueod it sawa sa 69KV transmission line sa Sitio Pangawasan, Poblacion Makato, Aklan it National Grid Corporation of the Philippines (NGCP) hay naka-apekto sa sub-stations it Nabas, Lezo, Andagao ag Altavas.
Ginpaathag pa ni Engr. Martinez nga ro NGCP ro nagadumea sa pagpadaea it kuryente halin sa power grid paagto sa mga electric cooperatives ag iba pang distribution facilities.
Ginapatihan nga nagkamang ro sawa ag nakasueod sa circuit breaker ag nakuryente.
Ro owa eon it kabuhi nga sawa hay narekober sa nasambit nga lugar it mga nagbiyahe pang linemen it NGCP halin sa Panit-an, Capiz.
Nag-umpisa ro blackout bandang alas-5:40 it hapon.
Naibalik sa normal ro supply it kuryente bandang alas-9:40 it gabi-i.
