KALIBO, Aklan—Nagaguwa sa imbestigasyon makarun it mga otoridad nga homicide-suicide ro naging rason it pagkamatay it daywang ka mga turista nga nauna eun nga nasapwan nga patay sa sueod it andang hotel room sa Barangay Balabag sa Isla it Boracay.
Suno kay P/Lt.Col. Don Dicksie De Dios, hepe it Malay PNP nga nagaguwa sa resulta it eksaminasyon nga ro ginkamatay it biktimang babayi nga ginkilaea kay Maria Cecilia Jellicode, 44 anyos ag sangka Australian national ag presenteng naga-istar sa Metro Manila hay bangud sa nakitaan nga impact it pagtama it anang ueo sa matig-a nga bagay ag gin-ueok sa anang liog hasta nga namatay.
Samtang ro eaeaking biktima nga si Dennis Yu Villaluz, 44, it San Mateo Rizal hay may nakitaan man it nina sa anang waea ag tuo nga siki kun sa siin ginapatihan nga naubusan man it dugo ag namatay.
Base sa footage it CCTV, nagguwa pa sa hotel ro eaeaki nga bukon eun it kaibahan ro babayi ag dikato hay ginapatihan nga nagbakae raya it sangka cutter nga gingamit sa paglaslas it anang kaugalingon.
Ginapatihan nga nag-away ro daywa hasta nga naunang ginpatay it eaeaki ro babayeng biktima ag pagkatapos nga nahimo ro krimen hay ginlaslas man kara ro anang kaugalingon.
Sa makarun hay ginakonsidera eun nga sarado ro kaso it nasambitan nga insidente matapos nga magpahayag ro pamilya it magtimbang nga parte nga sanda hay kumbinsido eun sa resulta it eksaminasyon.
