KALIBO, Aklan — Magabuylog ro Bagong Alyansang Makabayan ukon BAYAN-Aklan sa pagahiwaton nga nationwide nga protesta kontra korapsyon kadungan sa pagdumdum sa ika-77 nga anibersaryo it International Human Rights Day, hin-aga nga adlaw it Miyerkules, Disyembre 10 .
Suno kay Kim Sin Tugna, provincial coordinator it Bayan-Aklan nga ro hayagan ag maeapnagon nga korapsyon nga nagakatabu sa Pilipinas hay sangka maeapnagon man nga pag-eabag sa tawhanong kinamatarung, kawad-an it hustisya ag red tagging.
Bangud kara, uman nanda nga ginapanawagan nga dapat eon nga manabat ro mga eakot sa maanomaliyang flood control projects , wakasan eon ro red tagging ag bungkagon ro National task force to End Local Communist and Armed Conflict (NTF-ELCAC).
Ro andang protesta hay maga-umpisa bandang alas-2 it hapon sa Kalibo Pastrana Park ag maga-martsa paagto sa Crossing Banga-New Washington.
