Mahimo ipabilin nga sekreto it International Criminal Court (ICC) ro pag-isyu it arrest warrant hasta sa daeyon eun raya nga maiserbi sa mga akusado sa sigon hay crimes against humanity nga nahimo sa idaeom it war on drugs it nagtaliwan nga Duterte administration.
Paliwanag ni ICC assistant to counsel Maria Kristina Conti nga mahimo mag-anunsiyo ro ICC nga hadakpan eun nanda ro wanted sa Pilipinas ag kun paadto eun sa The Hague kun siin nakabase ro international tribunal.
Sa makaron, bukon pa it sigurado ni Conti kun igaisyu ro nasambit nga warrant makaron nga Nobiyembre o sa unang bahin it 2025.
Ginpunto man ni Conti nga ro panawagan makaron it ICC para sa mas maabo pa nga testigo sa imbestigasyon it crimes against humanity hay nagapakita sigon nga masinsinan ro ginahimo nga pag-usoy it ebidensya.Una kara, base sa mga dokumento it ICC, ginpangaeanan bilang suspek sanday dating Pangueong Rodrigo Duterte, dating PNP chief ag presenteng Sen. Ronald dela Rosa, dating PNP officials Oscar Albayalde, Edilberto Leonardo, Eleazar Mata, ag dating Criminal Investigation and Detection Group chief at kasalukuyang Northern Luzon commander, Maj. Gen. Romeo Caramat Jr.
Samtang, nauna eun nga nagpanindugan ro presenteng administrasyon sa posisyon kara nga indi makipagbuligan ro PH sa imbestigasyon it ICC bangud bumueag eun kara ro atong nasyon kato pa nga 2019.
Sa datos it gobyerno, ginabuebanta nga una sa 6,000 ro drug personalities nga hapatay sa madugo nga drug war apang sa pagbuebanta it human rights groups, nagahampak it hasta 30,000 ro hapatay sa katung-anan it giyera kontra ilegal nga droga sa idaoem ni dating PRRD.
