KALIBO, Aklan–Ginpaathag it sangka abogado nga owa it hurisdiksyon ro International Criminal Court ukon ICC bangud nga bukon eon it miyembro kara ro Pilipinas.
Raya hay kasunod it pagbasura it ICC sa apela it nasyon nga indi eon pagpadayunon ro pag-imbestiga sa war on drugs it Duterte administration.
Suno kay Atty. Janmar Barrios it Barrios Law Firm nga sangka sovereign nation ro pilipinas ag may nagahueag nga hustisya.
Ginpahayag dugang nga mabudlayan eamang ro ICC nga arestuhon sanday dating pangueong Rodrigo Duterte ag dating PNP chief ag makaron hay senador Ronald ‘bato’ Dela Rosa.
Gindugang pa ni Atty. Barrios nga maskin nga madayun ro imbestigasyon it ICC ag indi man magpakita it kooperasyon ro gobyerno it pilipinas hay mabudlayan ro mga raya ag posibleng mabuhayan ro pag-usisa.
Nauna eon nga ginpamilit ni Justice Secretary Jesus Crispin Remulla nga indi maga-comply ro Pilipinas sa pag-isyu it warrant of arrest it ICC kun sa siin eakot kara ro pilang indibidwal nga gina-angot sa war on drugs.
Suno kay atty barrios nga kinahangean pa nga magsumite it ebidensya it nasambit nga korte sa gobyerno it Pilipinas kun gusto kara nga mapasabat ro pilang mga opisyal.
