KALIBO,Aklan — Kabilugan nga naging madinaeag-on ro ginpatigayon nga retreat and ika-126th plenary assembly it Catholic Bishops’ Conference of the Philippines ukon CBCP sa Marzon Hotel sa Jaime Cardinal Sin Avenue sa banwa it Kalibo nga nag-umpisa ko Hulyo 3 ag nagtapos kahapon nga adlaw it Lunes, Hulyo 10 it presenteng dag-on.
Sa sangka press conference, ginsambit ni CBCP president Most Rev. Pablo Virgilio (Ambo) David it Bishop of Kalookan ro mga naging highlights it aktibidad nga gintambungan it 84 nga mga Obispo ag administrators ag ro kauna-unahan nga pagpasakop it Apostolic Nuncio to the Philippines, Most Rev. Charles John Brown.
Ginpahayag dugang ni Bishop David nga bukon eamang it sa retreat nanda nakipagbahin ro Papal Nuncio kundi maging sa andang eskursyon sa isla it Boracay.
Sa nasambit nga eskursyon hay nakipagkita ro mga Obispo sa Aeta Community kon sa siin ginpaabot ni Bishop Jose Corazon Talaoc it Diocese of Kalibo ro problema nga ginapangatubang it mga Aeta.
Raya hay matapos nga nagapameligro nga mawad-an it ilistaran ro mga Aeta bangud sa mga petisyon it land developer sa Certificate of Land Ownership nga napasaalima it mga Aeta sa tyempo ni dating Pangueong Rodrigo Duterte.
Angot kara, nag-apela ro CBCP sa national ag local government kamana man sa mga private developers nga respetuhon ro CLOA nga gintao sa mga Aeta.
