KALIBO, Aklan—Ginkumpirma ni Dr. Feliciano Buenafe, Jr. Schools Division Superintendent it Aklan nga ginpasugtan eon it central office it Department of Education ro pagpatigayon it physical end-of-school-year rites ukon in-person graduation sa mga eskwelahan nga una sa idaeum it alert level 1 ag 2 kapareho it probinsiya it Aklan.
Suno kana nga maabu eon sanda nga mga eskwelahan nga gin-aprubahan nga gustong magpatigayon it graduation ag moving-up ceremonies.
Apang raya sigon hay may kundisyon nga kinahangean nga masunod ro mga gintaeana nga health and safety protocols.
Dapat man sigon nga ro aktibidad hay may nagakaigo nga abiso halin sa natungdan nga local government units ukon local IATF kamana man sa ginikanan it mga estudyante.
Ginpadumdum man it opisyal nga kinahangean nga obrahon eamang nga simple ro graduation agud nga malikawan ro paggastos it abu.
Ro in-person graduation hay dapat nga mapatuman anuman nga adlaw umpisa Hunyo 27 hasta Hulyo 2.
Gindayaw man nana ro mga learners nga maga-graduate kaibahan ro andang mga ginikanan sa owa pagsurender ukon pagpundo it pag eskwela sa tunga it malisod nga sitwasyon tuga it pandemya.
Sa pihak nga parte, “wait and see” sigon sanda sa mga bag-ong polisiya nga igapatuman it masunod nga sekretryo it Department of Education.
