Kalibo, Aklan-Gindayaw it Filipino Community ro Indonesian immigration sa madasig nga aksyon ag pagkaaresto kay dismissed Bamban, Tarlac mayor Alice Guo. Raya hay makataliwan ro pilang adlaw kat madakpan ro anang mga kaibahan nga nagpaeagyo nga sanday Shiela Guo ag Cassandra Li Ong.
Sa makaron suno kay Bombo International Correspondent Ginavella Limpin-Cumla, ginabantayan nanda ro posibleng demand it Indonesian government. Ro nagguwa suno kana nga impormasyon hay gusto it gobyerno it Indonesia nga makipagbayluhan it preso sa Pilipinas ag raya hay ro sangka drug suspect kabaylo ni Alice Guo nga presenteng una sa kustodiya it mga pulis sa nasambit nga nasyon.
Ginpahayag dugang nga ro ginahinyo sigon it Indonesia hay i-swap si Guo kay Gregor Johan Haas, nga gin-aresto ko Mayo 15. Si Haas, 46-anyos hay naaresto it Bureau of Immigration sa Bogo, Cebu matapos magpaguwa it red notice ro Interpol bangud sa kasong ginpasaka kontra kana it mga awtoridad sa Indonesia.
Si Haas hay ginakabig nga “high-profile fugitive” ag ginapahayag nga miyembro it Sinaloa cartel, sangka internasyonal nga sindikato it krimen nga nakabase sa Culiacan, Sinaloa ag Mexico, nga eakot sa drug trafficking ag money laundering. Ginaangot it Indonesian authorities si Haas sa hana nga pagpuslit it limang kilong shabu nga nakatago sa shipment it floor ceramics paadto it Indonesia ko buean it Disyembre.
