Nagpaandam si Iran Supreme leader Ayatollah Ali Khamenei it posibleng pag-eontad it regional conflict engkasong umatake ro Amerika.
Ginpahayag ni Khamenei nga sayod it Amerika nga engkasong mag-umpisa raya it gyera, magaabot raya sa sangka regional war.
Ginhimo it Iran Supreme leader ro paandam matapos magpamaeag si US President Donald Trump it pagpasilabot sa Iran angot sa nuclear ambitions kara ag matapos ro deadly crackdown sa mga protesta kontra sa gobyerno it Iran.
Bilang kaparte man it ginahimo nga build up it pwersa it Amerika maeapit sa Iran, nagpadaea raya it aircraft carrier nga USS Abraham Lincoln sa rehiyon ag ko nagtaliwan nga dominggo, ginkumpirma it US Central Command nga nagaoperate raya sa may Arabian Sea.
Apang, uwa nagakahakat ro Iran Supreme leader ag ginhambae nga uwa nagakahadlok ro Iran sa mga aksiyon it Amerika.
Samtang, base sa datos halin sa US-based Human Rights Activists News Agency, masobra sa 6,300 katawo eon ro kumpirmadong napatay sa kinagamo sa Iran halin kat nagtuhaw raya ko Disyembre 2025.
