KALIBO, Aklan—Mas pabor si Christine Hope Pagsuguiron, Sangguniang Kabataan ukon SK Aklan Federation Vice President nga rebisahon anay it presenteng administrasyon ro curriculum it K-12 program.
Raya hay sa atubang it mga panawagan nga duea-on eon ro nasambit nga programa.
Suno kana nga dapat nga uman nga usisaon it Department of Education ro curriculum kun nagakabagay raya nga igabalik sa dating ap-at nga dag-on nga secondary education.
Ginpahayag dugang nga kinahangean nga ro tuyo it pag-review ukon evaluation sa K to 12 curriculum hay bukon it agud nga i-abolish eagi raya kundi nga mag-usoy it pamaagi agud nga mas pang mapamayad ro programa.
Dapat sigon nga makita kon ano ro naging implementasyon kara, kon raya baea hay naging epektibo, naging madinaeag-on ag na-sustain.
Engkaso nga may kakueangan, dapat nga magbueuligan ro tanan kaibahan ro mga stakeholders.
Nasayuran nga ro K to 12 program hay sambilog sa mga priority programs it Aquino administration nga ginbase sa ASEAN Integration 2015 kun sa siin kinahang-ean nga maka-eagas ro Pilipinas sa pagiging world class sa patag it edukasyon.
