BANGA, Aklan—Samtang nagabuhay ro pag-inusoy kay Jhuros Flores, mas nagiging mailap ro kahigayunan nga makit-an ro anang eawas.
Apang uwa gihapon nagsurender ro maeapnagon nga search, rescue and retrieval operation it mga disaster risk reduction management council personnel it mga nagkaeain-eain nga banwa sa Aklan, volunteer divers and swimmers nga naghalin pa ro kaeabanan kanda sa mga kaeapit naton nga probinsya hasta sa nagpull-out ro mga raya ko nagtaliwan nga adlaw.
Kapin sa daywang adlaw man nga nagpatigyaon it re-channeling it tubi sa Aklan river nga ginpangunahan it mga quarry operators agud nga makabulig sa pag-usoy sa eawas ni Jhuros.
Apang, nagapabilin ro kapas-eawan nga makit-an raya sa lugar kon sa siin imaw ginasugid nga naeomos ko Enero 29, 2025.
Sa pihak kara, ginpahayag ni Alyas Tiray nga base sa sugid it anang Tatay kato nga tyempo nga dikato nga lugar hay may makit-an nga buho nga ginatawag nanda nga kweba.
Ginpahayag dugang nga may taglugar gidman sa porsyon nga ginpaligsan ni Jhuros bangud nga suno pa sa sugid it anang tatay hay may kataw nga nagaguwa sa nasambit nga buho ag gintaw-an pa raya it mutya.
Masami sigon nga nagabilin ro anang tatay nga magtawag sa andang kaeapit engkaso nga inde imaw kabutwa sa sueod it sang oras nga pag-eonip.
Madumduman nga nagkaeain-eain nga faith healer ro nagpatigayon it pagban-aw agud nga makabulig eamang sa pag-usoy sa nasambit nga binatilyo.
