KALIBO, Aklan–Ginpasaeamatan it pamunuan it St. John The Baptist Cathedral ro madinaeag-on nga pagpatigayon kahapon it tradisyunal nga pagpapanaog kay Señor Sto. Niño de Kalibo ag devotional novena mass nga senyales it opisyal nga pag-umpisa it Kalibo Ati-Atihan festival 2023.
Suno kay Fr. Tudd Belandres, Parish Moderator it simbahan nga raya hay pinaagi sa pagbueuligan it mga nagpasakop nga tribu ag lokal nga gobyerno it Kalibo.
Ginkalipay man nanda ro pagpasakop it maabu nga mga deboto ni Sto. Niño sa nasambit nga religious activity.
Raya suno kana hay umpisa eon it kapistahan ni St. Sto. Niño de Kalibo ag adlaw adlaw nga panaad ag debosyon.
Kadungan kara, nag apela si Fr. Tudd sa mga deboto ag mga bisita nga likawan ro paghimo it gulo sa sang domingo nga selebrasyon eabi eon it mga pamatan-on agud nga maipakita ro debosyon sa unga nga hesus.
Sa pihak nga parte, ro tradisyunal nga paeapak sa guwa it Kalibo Cathedral nga nag-umpisa eon hay sambilog man sa andang ginpahauman bangud sa adlaw adlaw nga pagbuhos it mga devotees.
Raya hay naga umpisa it alas-6 it agahon hasta alas-9 it gabi-i.
Samtang, nag-umpisa eon man ko Biyernes ro Pagbisita ni Santo Niño sa Baryo ukon chapel visitations kamana man ro daily novena mass.
Sa Enero 14, magapatigayon it penitential procession sa alas- 4 it aga-aga sa Bisperas it Kapistahan ni Señor Santo Niño de Kalibo.
Pagasundan raya it blessing it mga inunga, tribu, banda ag mga grupo bandang alas 11 it agahon ag Ro Hornada sa alas- 12 it udtro adlaw sa Pastrana Park ag Kalibo Cathedral grounds.
Magapatigayon it translacion bandang alas-6:30 it gabi-i ukon pagsaylo it imahe ni Sto. Nino sa prente it cathedral bilang preparasyon sa pilgrims’ mass, sambilog sa mga highlight it Kaadlawan it Kapistahan ni Señor Santo Niño de Kalibo nga pagasundan it grand procession bandang alas-9 it agahon.
Bandang alas 3 it hapon, magapatigayon it procession it Santo Niño images ag torch parade ag pagakatapos hay ro closing liturgical rites nga simbolo it pagkatapos it sang domingo nga religious celebration.
Samtang, gin engganyo ni Fr. Tudd ro mga deboto nga magtan-aw it exhibit it nagkaeain-eain nga images it Sto. Nino sa sueod it simbahan kaeakip ro anang kasaysayan.
