KALIBO, Aklan—Kapin sa 2,400 uniformed police ro ginaeauman nga igadeploy sa banwa it Kalibo sa pag-arangkada it in person weeklong celebration it Sto. Niño Ati-atihan Festival 2023.
Suno kay Carla Doromal, executive assistant 1 it office of the mayor nga mag-eowas sa mga kapulisan hay may iba pang force multipliers nga magasekyar it seguridad ag keowasan it mga deboto, merrymakers, turista ag mga bisita sa pagbalik it face to face nga festival matapos ro haeos daywang dag-on nga temporaryong pagpaiway kara bangud sa pandemya.
Paga-umpisahan ro selebrasyon sa aktibidad it Ati-atihan fashion festival nga igapatigayon sa Museo it Akean kon sa siin iga-highlight kara ro ginapabugae nga piña cloth products pinaagi sa pagmodel it mga dresses ag gowns nga pagasuksokon it mga Akeanon beauty nga nagdaog sa national ag international pageant.
Pagasundan dayon raya it Barter of Panay kon sa siin dikara man igapakita kon anu ro ginhalinan it festival it Kalibo nga ginakabig man nga Mother of All Philippine Festivals.
Ginpahayag dugang ni Doromal nga haeos tanan nga events ag activities para sa ginakaeangkagan nga kapyestahan it patron nga si Sr. Santo Niño hay kasado eon bangud nga kon anu ro guidelines nga ginpatuman ko opening salvo hay dato man sigon ro pagasundon makaron nga Ati-atihan festival.
Ro Ati-atihan festival makaron nga dag-on hay pagadumaeahan it lokal nga gobyerno it Kalibo ag Kalibo Ati-Atihan Festival Board.
