KALIBO, Aklan—Kapin sa 141 percent ro gintaas it dengue cases maghalin sa period it Enero 1 hasta it Agosto 24, 2024 kon ikumpara sa kaparehong period it nagtaliwan nga dag-on.
Suno kay Roger Debuque, program officer 2 it Aklan Provincial Health Office nga nakalista ro andang taeatapan it kabilugang 1,820 nga kaso it mga nagmasakit it dengue sa bilog nga probinsya it Aklan.
Sa nasambit nga numero, pinakamataas kara ro maghalin sa banwa it Malay nga nakalista it 329; Kalibo nga may 284 nga kaso ag Nabas nga nakalista it 137 nga mga indibidwal nga tinamaan it dengue.
Ginpahayag dugang ni Debuque nga haeos tanan nga kabanwahanan sa bilog nga probinsya it Aklan hay may nailista eon nga kaso it dengue.
Sa kamatuoran suno pa kana, ap-at eon ro namatay bangud sa nasambit nga sakit maghalin sa mga banwa it Batan, New Washington, Balete ag Tangalan.
Una sa edad it sang dag-on hasta 20-anyos nga kaeabanan hay mga estudyante ro mga nabiktima it eamok nga aedes egypti nga nagadaea it masakit nga dengue.
Sa mga eskwelahan sigon ro andang pokus makaron agud nga matapna eon ro pag-inabo it kaso it dengue.
Panugyan ni Debuque nga inde pagbaliwalaon kon makabatyag it anumang sintomas it nasambit nga sakit ag magpakonsulta eagi sa doktor para maagapan ro kondisyon ag ugalion nga magpanglimpyo sa palibot agud nga uwa it maistaran ro mga eamok.
