KALIBO, Aklan—Gin-isnab it mga miyembro it Kalibo Sr. Sto. Niño Ati-Atihan Management Council, Inc. ukon KASSAMACO ro committee hearing nga ginpatawag it sangguniang bayan it Kalibo.
Suno kay SB member Augusto Tolentino nga imbes magtambong hay nagpadaea it sueat ro nasambit nga festival organizer nga nagahambae nga ro pagpatawag kanda hay owa it kaangtanan ag nagatuga eamang it saea nga impresyon ag impormasyon sa mga pumueuyu it banwa it Kalibo kamana man nga nagapataeang bangud sa kawad-an it nagakaigo nga pag-usisa.
Gindugang pa ni SB Tolentino nga gusto eamang nanda nga maklaruhan ro tanan eabi eon ro financial ag evaluation report bangud eakot kara ro kwarta it publiko.
Nagatuhaw man suno kana nga matsa owa sanda it kinamatarung nga magpatawag.
Klaru sigon nga gin-eabag it KASSAMACO ro Memorandum of Agreement bangud sa atrasado nga pagsumite it nasambit nga mga report, kun sa siin, imbes nga March 20, 2020 ukon 60 diyas pagkatapos it festival nga ginpatigayon ko Enero 10 hasta 19, 2020 hay ginpasa nanda raya ko Mayo 28, 2020 eon.
Gusto eamang kunta nanda sa uman nga pagpatawag sa KASSAMACO nga masayuran ro mga kontrata ag resebo it ginpatigayon nga Miss Kalibo Ati-Atihan pageant bangud sa kwestiyunabli nga gastos eabi eon ro ginbayad sa mga celebrity hosts ag singers.
Mag-eowas kara ro koleksyon ag expenses sa stalls sa Kalibo Magsaysay Park ag Kalibo Pastrana Park kamana man sa push cart, kiosko, Hala Bira Ati-Atihan nights, space advertisement ag iba pa.
Ginpasiguro pa it opisyal nga bukon pa it tapos ro andang imbestigasyon eabi pa ag ginhambaean sanda it festival organizer nga mga bobo partikular imaw nga author it resolusyon.
