KALIBO, Aklan—Maga-umpisa eon sa masunod nga domingo ro evaluation it LGU kalibo sa mga nagpasakop sa Sustainable Home Grown Food Project nga nagatuyo nga mapabaskog ro food security ag nutrition sufficiency it banwa kamana man nga mapatuman it husto ro waste segregation.
Raya ro ginpahayag ni Adorada Reynaldo, public services officer 3 it LGU Kalibo.
Ko Abril 26 hasta 30 suno kana hay nagpatigayon sanda it training/seminar kaibahan ro workshop kun sa siin hay gin imbita nga mga resource persons agud nga makatau it dugang nga kasayuran sa mga participants sa raya nga edible garden contest.
Ro nasambit nga contest suno kana nga nag-umpisa ko Mayo 1 hay may daywang kategorya nga ginakaeakipan it edible communal garden ag home edible garden.
Ro paindis-indis hay magatapos sa Hulyo.
Sa makaron hay magalibot ro contest committee agud nga masayuran ro development it proyekto it mga nagpasakop.
Nasayuran nga may ginpahaum nga mga papremyo ro LGU sa communal garden kung siin ro 1st place hay sarang makabaton it P20,000; 2nd place P15,000, 3rd place P10,000 ag pito ro maga-uli it tig P5,000 bilang consolation prizes.
Samtang, sa home garden posibleng mag-uli ro 1st place it P10,000; 2nd place P7,000 ag 3rd place nga P5,000.
May ginpanupod man nga libreng mga garden tools ag mga seeds ukon 15 nga nagkaeain-eain nga klase it tinuean-on.
