KALIBO, Aklan–Sigidas eon ro pagproseso it lokal nga gobyerno it Kalibo para sa igapatindog nga bag-ong edipisyo it Rural Health Unit (RHU)-I.
Ginpahayag ni Kalibo Vice Mayor Dr. Cynthia Dela Cruz nga target nanda nga ipatindog ro bag-ong RHU-I sa bahin it Brgy. Andagao kung siin nakataeana eon nanda nga pagabayran ro eugta makaron nga dominggo.
Ginaeauman nga paga-umpisahan eon ro konstruksyon kara sa maabot nga buean it Mayo ukon Hunyo.
Tuyo kara nga mas pang mapabaskog ag mapaeapit sa mga pumueoyo ro serbisyong medikal.
Ro pondo sa pagpatindog it RHU-I hay halin sa premyo it LGU matapos nga magdaog it Seal of Good Local Governance nga nagakahaeaga it P5 million.
Mag-euwas kara, target man it LGU nga magpatindog it RHU-III ukon Super Health Center sa Brgy. Nalook, Kalibo nga nagakahaeaga it P15 million.
Samtang, ro RHU-IV hay planong ibutang sa bahin it Brgy. Tigayon.
