Kalibo Aklan ——Uman nga nag apela ro lokal nga gobyerno it Kalibo nga taw-an anay it tsansa ro andang nagapadayun makaron nga dry-run para sa implementasyon it re-routing scheme ag pay parking nga magatapos sa Pebrero 28, 2021.
Raya hay base sa Municipal Ordinance No. 2020-02 may kaangtanan sa Transport and Management Code it banwa nga nagatuyo nga ma-de-congest ag mapahagan-hagan ro numero it mga tricycles sa mga masako nga daeanon sa Kalibo kamana man ro Memorandum Circular No. 2020-036 it DILG nga nagabawae sa mga tricycles nga mag-agi sa mga national highways.
Suno kay Kalibo Mayor Emerson Lachica nga mismong ro Federation of Kalibo Tricycle Operators and Drivers Association Inc. (FOKTODAI) ro naghinyu kanda nga magpatigayon it dry run para sa rerouting rason nga insigida nanda nga gin-aksyunan .
Aprubado sigon ro tikang it 14 sa 16 nga mga Presidente it nagkaeain-eain nga TODA sa banwa it Kalibo.
Haeos tanan man sigon nga mga nagabiyaheng tricycle hay naga-agi sa mga nagapangunang daeanon sa Kalibo rason nga owa man it problema.
Samtang, plano ni Mayor Lachica nga uman nga magpatawag it meeting sa Pebrero 28 sa mga TODA officers agud nga mabo-oe ro andang sentimiento sa dry run .
Ginduea man it alkalde ro pagkabaeaka it mga apektadong commuters ag mga drivers bangud nga pwede pang maamyendahan ro ordinansa it Sangguniang Bayan.
Samtang, pilang pili nga lugar eamang sigon ro andang gintaeana nga paid parking agud nga malikawan ro eapnaag nga pagparada it mga saeakyan sa mga nagapangunang karsadahon.
Samtang, gin-insister man ni SB member Matt Aaron Guzman , Chairman it Committee on Transportation nga maskin nga owa man sanda nagkueang sa pagpaabot it impormasyon , apang pagadugangan pa sigon nanda ro andang information dissemination para sa kaklaruhan it tanan.
Ginpasiguro sigon nanda sa planning stage nga ro tanan nga mga nagabiyaheng tricycle nga nagasueod sa banwa it Kalibo hay maka-agi sa mga estratehikong lugar agud nga indi mabudlayan ro mga commuters.
