KALIBO, Aklan—Ginkalipay it lokal nga gobyerno it Malay ro uman nga pagkaeakip it isla it Boracay sa Top 10 “Favorite Islands in the World 2023” list it Travel + Leisure Magazine.
Raya hay matapos nga nakabuoe ro isla it score nga 92.94% rason para mabutang raya sa ika-10 nga pwesto.
Suno kay Malay Sangguniang Bayan member Alan Palma nga positibo sanda nga mas maka-engganyo raya it maabu nga turista halin sa nagkaeain-eain nga parte it kalibutan.
Pila sa mga nakikita nana nga rason it padayun nga pagpangibabaw it Boracay bilang sambilog sa paboritong destinasyon sa kalibutan hay ro maayos nga sistema agud nga makaangkon it manami nga experience ro mga bisita, madasig nga pagsabat sa problema angot sa implementasyon it ordinansa, pagpabilin it kalimpyo sa baybayon, pag-ayos karsada ag transportation system.
Kumpiyansa man imaw nga makadugang raya it inspirasyon ag motibasyon sa tanan nga nagadumaea sa Boracay agud mas pang pasanyugon ro pag-amlig sa isla.
Raya sigon hay bunga it hugut nga kooperasyon, suporta ag disiplina it nagkaeain-eain nga sektor.
Nagaeaum sigon sanda nga mas pang magataas ro tourist arrival sa mga maabot nga adlaw.
