KALIBO, Aklan — Posibleng sa Hulyo 15 hay iga-anunsyo eon it partidong Tibyog-Akean ro andang kompletong listahan it andang mga kandidato para sa nagkaeain-eain nga posisyon nga magasabak sa maabot nga midterm elections.
Raya ro ginpahayag ni Punong Barangay Rizal “Ric-Ric” Rodriquez Jr., it Cabugao, Batan.
Apang blangko pa sigon imaw kon sin-o ro mga napilian nga opisyal nga kandidato sa kada banwa .
Angot kara, ginpahayag ni Kapitan Rodriquez nga haum imaw nga magpadaeagan sa pagka-alkalde it Batan engkaso nga mapilian it partido.
Nagapanguna sigon nana nga rason sa pagsueod sa pulitika hay agud nga makaserbisyo sa publiko pinaagi sa anang mga mayad nga inisyatibo.
Pagahueaton sigon nana ro bendisyon it mga matag-as nga opisyal it partido kon igatau kana ro nasambit nga posisyon.
Nauna eon nga gin-anunsyo it Commission on Elections (Comelec) nga ro period para sa filing it Certificates of Candidacy ukon COCs para sa May 2025 midterm elections sa maabot nga Oktubre 1 hasta 8.
