KALIBO, Aklan—Ginklaru ni league of the municipalities of the Philippines ukon LMP-Aklan chapter president ag Ibajay mayor Joen Miraflores nga ro mga biyahe eamang it locally stranded individuals ukon LSIs ro temporaryong ginsuspinde , apang bukon it apektado ro returning overseas Filipino workers ukon OFWs nga gustong mag-uli sa Aklan.
Raya hay kasunod it mandu ni defense secretary ag national task force chairperson delfin lorenzana nga punduhon anay ro pagpa-uli sa mga LSIs nga taga western visayas bangud sa pagtaas it kaso it coronavirus disease ukon covid 19 partikular sa negros occidental ag iloilo.
Suno kay mayor miraflores nga nagapabilin nga preparado ro mga local government units sa aklan sa pagbaton it mga LSIs eakip ro andang mga ligtas covid center.
Nakalista suno kana sanda it 243 nga LSIs nga nabuligan nga maka-uli sa aklan partikular ro mga unang na-stranded, kun sa siin, ro iba sa mga raya hay nakatapos eon it andang daywang domingo nga quarantine procedure samtang ro iba hay padayun nga gina-monitor eabi eon ro mga ginpaidaeum sa strict home quarantine.
Ginadayaw man sigon nanda ro trabaho it mga barangay health emergency response team ukon BHERTs sa pagbantay sa andang natungdan nga lugar.
Madumduman nga nauna eon nga nagpaguwa si Aklan Governor Florencio Miraflores it Executive Order No. 028 nga umpisa sa hulyo 1 hay pagapasugtan eon ro domestic flights halin sa Metro Manila agud nga maka-uli eon ro mga stranded nga OFWs ag LSIs.
Apang sa advisory nga ginpaguwa it department of interior and local government ukon DILG region 6 hay ro mga LSIs eamang ro ginbaeabagan nga temporaryong maka-uli .
Samtang, ginpahayag ni mayor miraflores nga bukon imaw it pabor sa nasambit nga tikang.
Kunta suno kana hay hugtan eang it national task force ro mga guidelines ag protocols agud nga indi madaea it mga raya ro covid infection sa andang pag-uli sa andang natungdan nga banwa.
Ginpasaeamatan man nana ro mga aklanon sa andang suporta ag kooperasyon rason nga nagapabilin nga covid free ro aklan ag owa it nailistang local transmission.
