KALIBO, Aklan — Nagapadayun ro pagpahaum it lokal nga gobyerno it Aklan para sa implementasyon it ‘Benteng Bigas Meron Na’ program it administrasyon ni Pangueong Ferdinand Marcos Jr.
Suno kay Aklan Provincial Agriculturist Engr. Alexys Apolonio nga sa makaron hay sigidas ro andang hinun-anon ni Governor Joen Miraflores partikular ro pag-usoy it pondo para mataw-an it katumanan ro programa sa probinsiya.
Owa suno kana naeakip ro programa sa andang budget allocation para sa makaron nga 2025.
Dugang pa nana nga ro baligya kanda it National Food Authority (NFA) hay P33 per kilo it bugas rason nga maga-usoy sanda it budget para sa P13 nga kueang.
Samtang, plano man it provincial government nga magtukod it mga Kadiwa Centers sa banwa it Kalibo agud nga dikara igabaligya ro baratong bugas, apang ginapag-isipan pa nanda kon paalin nanda maabot ro mga maeayo nga banwa kapareho it Libacao ag Buruanga.
Magiging nagapangunang benepisyaryo kara hay ro vulnerable sector kapareho it mga senior citizens, PWDs ag mga nabdos.
Indi pa sigon nana masabat kon hin-uno igapatuman ro baratong bugas sa Aklan ag pilang sako ro sarang nga maibaligya bangud nga nakadepende kara ro mausoy nga counterpart fund.
Ginpasiguro man ni Engr. Apolonio nga manami nga klase it bugas ro igabaligya bangud nga kaeabanan sa stock makaron it NFA sa andang mga bodega hay halin sa Aklan nga gin-ani it mga local farmers ko nagtaliwan nga harvest season.
Ro programa hay ginasugid nga magabuhay hasta sa Disyembre ag engkaso nga kueangon ro stock hay posibleng maga-import halin sa Mindoro ukon magapadaea ro NFA Central Office.
Tuyo suno kana it programa nga maabot ro food security para sa mas pang pag-umwad it probinsiya.
