ALIBO, Aklan—Pormal eon nga ginbuksan ro opisina it Land Transportation Office ukon LTO-Aklan western district sa banwa it Ibajay, kahapon adlaw it Sabado.
Natigayon nga magka-opisina sa nasambit nga lugar bangud sa pagbilog man ni Aklan 2nd District Congressman Ted Haresco it sangka laye nga magahalin sa opisina it LTO sa banwa it Ibajay maghalin sa Caticlan.
Suno kay Cong. Haresco nga pagpaeag ukon death threats ro gintunaan nga rason sa pagbilog nana it nasambit nga hagna.
Personal sigon kanang nagdangop si Acting Chief Director Felina Macabales para magpangayo it bulig angot sa nasambit nga mga death threats.
Gintutukan sigon it sangka persona si Macabales it baril ag adlaw-adlaw nga ginapaeag rason nga grabeng kahadlok ag pagkabaeaka ro adlaw-adlaw karang nae-ekperyensyahan.
Sangka persona sigon nga nagabuyot it mabahoe nga prangkisa sa bahin it western district ro sa likod it pagpamaeag sa dating Chief Director.
Ro nasambit nga laye hay tuyo nga maka-angkon it permanente nga opisina sa bahin it western district it Probinsya it Aklan.
Samtang, ginpabutyag pa gid it kongresista nga plano pagid nana nga magdihon it house bill nga tuyong magpatindog it opisina sa bahin it Isla it Boracay para indi eon man malisdan pa ro mga pumueuyo sa nasambit nga lugar nga magtabok pa sa mainland para sa pagproseso it andang mga nagakaigong dokumento.
