KALIBO, Aklan–Ginatun-an makaron it Land Transportation Office ukon LTO nga makaangkon it standard nga driving school rate para sa tanan nga mga driving school sa bilog nga nasyong Pilipinas.
Raya hay matapos mataeupangdan it LTO nga may pilang driving school ro nagasukot it sobrang mahae nga sangka requirements sa pagbo-oe it student’s permit ag mga naga-renew it lisensiya.
Nagapati si Engr. Marlon Velez, hepe it LTO-Aklan nga engkaso nga makaangkon it nasambit nga standard driving school rate hay masolusyunan ro nasambit nga problema.
Apang pagasiguraduhon man sigon it ahensiya nga indi man malugi ro mga driving school.
Sa makaron hay naga abot sa 6,000 hasta 10,000 pesos ro magastos kon magbo-oe it student permit kumpara dati nga masobra sa 2,500 pesos eamang.
Ginmanduan sigon sanda it central office nga eaparan pa ro pagtau it libreng Theoretically Driving Course sa mga magabo-oe it student’s permit ag naga-renew it mga lisensiya.
Kada buean hay may daywang batches sanda nga ginabaton nga ginaeakipan it 150 nga katawo kada batch.
Nauna eon nga ginareklamo ro mataas nga sukot agud nga makabo-oe it non-professional driver’s license sa mga driving school kun sa siin naka abot eon raya sa atensyon it kongreso ag senado.
