Kalibo Aklan——Haom nga magpasaka it kaso ro sangka opisyal it Land Transportation Office (LTO) Malay extension office sa sangka anchorman it FM radio station sa banwa it Kalibo matapos gin-akusahan sa kahanginan nga nagakolekta it haega it kwarta sa andang mga kliyente.
Suno sa tagreklamo nga si LTO-Malay Acting Chief Felina Macabales, 61-anyos ag residente it Brgy. Tigayon, Kalibo nga ginaalegar sigon ni Carlo Astorias nga nagakolekta imaw it P100 pesos ukon P500 pesos para sa proccessing fee.
Ro insidente suno kay Macabales hay nagtuga kana it kahuy-anan ag nagasamad sa anang reputasyon sa sueod it 33-anyos nga pagpanerbisyo bilang empleyado it LTO.
Ginpahayag dugang nga raya sigon ro unang kahigayunan nga naeksperyensyahan ro nasambitang kahuy-anan.
Suno pa kay Macabales, matapos nga mabatian ro tirada kana sa nasambitang radyo hay gilayon imaw nga nagpakita idto agud nga klaruhon ro anang kaugalingon angot sa isyu nga ginahaboy kana apang uwa sigon imaw pagtaw-i it tyansa nga maipaathag ro anang bahin.
Bangud kara, ginpakamayad eon lang sigon nana nga i-pablotter sa Kalibo Police Station ro nasambitang insidente.
