KALIBO, Aklan—Ninahan ag duguan nga gindaea sa Aklan provincial hospital ro sangka 61-anyos nga eaeaki matapos nga gin-eabo it anang kaugalingon nga igmanghod sa Brgy. Libang, Makato.
Nakaangkon it lastro sa waea nga alima, likod ag ueo ro biktimang si Roque Taborda matapos nga gin-eabo it suspek ag ana mismong kaugalingon nga igmanghod nga si Enrique Taborda, 47-anyos ag parehong residente it nasambit nga lugar.
Sa inisyal nga imbestigasyon it Makato Municipal Police Station, naga-inuman sigon ro daywa kon sa siin kat una eon sa idaeom it impluwensya it aeak hay nakaangkon it argumento sa tunga nanda nga nagresulta sa nasambit nga insidente.
Nakabaeos pa sigon ro magueang rason nga nalastruhan man ro manghod nga insigida man nga nadaea sa ospital para sa nagakaigong medikasyon.
Ro insidente hay padayon pang ginaimbestigahan it Makato PNP Station para sa nagakaigong disposisyon.
