KALIBO, Aklan—Ginpaabot ni Sangguniang Bayan member Alan Palma it banwa it Malay nga pagataw-an nana it prayoridad ro mga programa ag proyekto sa daywang ka komitiba nga anang ginapamunuan nga ginaeakipan it Committee on Public Works and Utilities, Communication and Information ag Committee on Market and Slaughter House.
Suno kana nga bangud nga naeakip imaw sa minority rason nga owa nana nabo-oe ro chairmanship nga anang ginahandum nga nagakabagay sa mga ginplastar nana nga plataporma de gobyerno ko tiempo it campaign period.
Sa pihak kara, nagaeuam imaw nga posible sa gihapon nga maduso ro anang plano nga obrahon ro mainland Malay nga kauna-unahan nga organic farming capital it probinsiya bilang miyembro it Committee on Agriculture.
Kaibahan sa anang plano ro pag-monitor kon ro tanan nga mga infrastructure projects nga ginpatigayon sa idaeum it pag-rehabilitate sa isla it Boracay hay naobra.
Raya hay matapos mataeupangdan nga may pilang portion it circumferential road ro owa pa natapos kamana man ro pagpasiguro nga ro tanan nga mga water utilities hay nakakasunod sa environmental laws ag naga-function ro mga drainage network.
Kinahangean suno kana nga malikawan nga mauman ro Boracay closure bangud sa kapabayaan it pilang indibidwal ag natungdan nga ahensiya it gobyerno.
Pagasayuron man sigon nana sa DENR ag CENRO pinaagi sa privilege speech kon ano ro pinakarason sa pag angkon it revision sa pagpa-eapad it karsadahon sa isla kun sa siin mag-eowas sa 12 meters nga existing hay gindugangan it 9 meters sa magtimbang nga karsada.
Nasayuran nga pormal eon nga ginturn-over it Boracay Inter-agency Task Force ro pagdumaea it isla it Boracay sa lokal nga gobyerno it Malay.
