KALIBO, Aklan—Bangud sa waea-tuo nga reklamo kontra sa mga isnabero ag nagapili it pasahero nga mga e-trike drivers, gusto ni Sangguniang Bayan member Alan Palma it banwa it Malay nga makaangkon it separadong mass transport vehicle ro mga trabahador ag residente sa isla it Boracay.
Aminado si Palma nga masyadong kueang ro numero it mga nagabiyahe nga e-trikes sa isla rason nga nagatuhaw ro nasambit nga problema.
Engkaso suno kana nga indi masolusyunan it Boracay Land Transportation Multi-purpose Cooperative ukon BLTMPC ro kakueangan it units it mga nagabiyahe nga public transportation hay mapilitan ro lokal nga gobyerno nga magpasueod it bag-ong investor nga maga-operate it mini-bus sa isla.
Ginpasiguro man nana nga pagasuportahan ro mga proyekto it administrasyon kon raya hay para sa kamaeayran it kaabuan.
