KALIBO, Aklan—Positibo ro Malay Tourism Office (MTO)-Malay nga maabot ro target nga 1.8 milyon ukon hasta 2-milyon ro tourist arrival makaron nga 2023 sa Isla it Boracay.
Suno kay MTO-Malay officer Felix delos Santos, raya hay matapos nga nag abot eon sa 872,978 ro tourist arrival sa isla umpisa Enero 1 hasta Mayo 20, 2023 kumpara sa kaparehong period ko 2022 nga nakalista eamang it 228,000.
Ginaboeobanta nga sa buean it Hunyo hay maabot eon nanda ro 1-million mark nga international ag domestic arrivals.
Amat-amat eon suno kana nga nagabalik ro dating kabaskog it turismo sa Boracay halin sa naging epekto it pandemya.
May mabahoe sigon nga ambag ro Boracay tourist arrival makaron nga dag-on sa nasyon kun sa siin 30% to 40% kara hay mga dumueuong.
Dugang pa ni Delos Santos nga nabatyagan eon nanda makaron ro pag inabu it mga foreign tourists, kun sa siin nagapanguna kara ro Korea, ginsundan it USA, China, Australia ag United Kingdom.
Mag-eowas sa South Korea, nakaangkon eon man it direct flight ro China sa Kalibo International Airport.
Nagaeaum sanda nga madugangan pa ro mga international flights agud nga mas nga mapabaskog ro turismo sa Boracay.
