Nadakpan ro isaea ka mangunguma matapos ro madinaeag-on nga buy-bust operation nga ginpatigayon it Aklan Provincial Intelligence Unit (PIU) kaibahan ro Kalibo Municipal Police Station (MPS) sa may terminal sa F. Quimpo Street, Barangay Andagao, Kalibo.
Ginkilaea ro arestado nga si Swelle Zaballero, 30 anyos, residente it New Washington, Aklan. Suno sa kapulisan, nag-adto ro suspetsado sa banwa it Kalibo antes ro operasyon.
Sa pihak it pagkadakop, ginpamalibaran ni Zaballero nga ana ro mga armas ag iba pang ebidensya nga narekober sa operasyon.
Nabawi it mga operatiba halin sa posesyon it suspetsado ro isaea ka caliber .45 pistol, isaea ka caliber .38 revolver nga may sueod nga mga bala, isaea ka magasin it caliber .45 nga loaded man, lima ka bala it caliber .45, tatlo ka bala it caliber .38, ag P18,000 nga ginamit bilang buy-bust money.
Padayon nga ginapaidaeom sa imbestigasyon ro suspetsado samtang ginapahaom it kapulisan ro mga angay nga kaso kontra sa suspect bangud sa ginaalegar nga pageapas sa mga batas nga may kaangtanan sa ilegal nga pagbaligya ag pag-angkon it armas de fuego.
