Ginpanindugan it beteranong abogado nga si Atty. Romulo Macalintal nga dapat eon nga pahilwayon sa kustodiya it anumang ahensiya it gobyerno it Pilipinas si Mary Jane Veloso nga ginturn-over sa Pilipinas matapos ro masobra 14 anyos nga pagkakulong sa Indonesia matapos masentensyahan it kamatayon may kaangtanan sa ilegal nga droga.
Ginpunto ni Macalintal nga ro drug trafficking charges nga ginsentensya kontra kay Veloso sa Jakarta hay bukon it applicable iya sa nasyon.
Suno kana, anumang benepisyo nga igatao it gobyerno it Pilipinas kay Veloso hay sandig sa transfer agreement sa gobyerno it Indonesia partikular eon para sa pag-facilitate it madinaeag-on nga reintegration ukon pagbalik sa komunidad it ginsentensiyahang indibidwal.
Ginpaathag dugang nga makaron nga ginpaubaya eon it Indonesian government sa gobyerno it Pilipinas ro pagahimuon nga sa tan-aw nanda hay makapamayad para kay Veloso, inde sigon pwedeng gamiton ni Pangueong Ferdinand Marcos Jr. ro anang pardoning power sa idaeom it Konstitusyon bangud ro nasambit nga gahum hay pwede eamang i-apply sa mga criminal nga convicted sa idaeom it laye it Pilipinas ag uwa sigon it hurisdiksiyon ro aton nga nasyon sa mga krimeng nahimo it sangka Pilipino sa ibang nasyon.
