Nagapameligro ro masobra sang milyong mga baboy sa probinsya it Batangas kasunod it ginakabaeak-an pang pagkalhit it African Swine Fever(ASF) sa nasambit nga probinsya.
Suno kay Department of Agriculture(DA) spokesman Assistant Secretary Arnel de Mesa, kapin pang ginstriktuhan ro pagbantay sa nasambit nga probinsya kadungan it padayon nga pag-abu it mga banwa ag syudad nga nakikitaan it mga bag-ong kaso.
Tanan sigon nga mga apektadong baboy hay kinahang-ean eon nga ma-dispose eagi agud mapunggan ro kapin pang pagkalhit it virus.
Sa makaron, waeong mga banwa ag syudad eon ro nakitaan it bag-ong kaso it African Swine Fever samtang daywang lugar eoon man ro nagdeklara it State of Calamity.
Nakikipagbueoligan eon man sigon ro DA sa provincial government ag mga municipal veterinarian para makontrol ro pagkalhit it sakit, samtang nagbutang eon man it mas hugot nga checkpoint sa mga boundary agud mapunggan ro pagguwa it mga baboy, karne it baboy, ag iba pang pork products.
Sa makaron, nagaabot sa 11 rehiyon ag 22 nga probinsya ro nagapabilin nga apektado it ASF sa bilog nga nasyon.
Raya hay ginakaeakipan it 65 munisipalidad.
Ro Batangas hay kaparte it CALABARZON Region nga sambilog sa mga nagapangunang producer it baboy sa bilog nga nasyon.
Nauna eon nga gin-engganyo it grupong Pork Producers Federation of the Philippines (PPFP) si Pangueong Ferdinand Marcos Jr. nga magdeklara it national state of calamity sa tunga it pagkalhit it African swine fever (ASF).
