KALIBO, Aklan — Sa tunga it paeag it African swine fever (ASF), naga-abot eon sa masobra sa 170 kilo it nagkaeain-eain nga misdeclared nga karne ag iba pang meat products ro nakumpiska sa Kalibo International Airport umpisa pa ko Enero hasta Hunyo it makaron nga dag-on.
Ko domingo nga adlaw hay panibag-ong 13 kilo it meat products ro ginhana nga ipuslit sa paeuparan it mga pasahero nga halin sa China ag South Korea.
Suno kay Dr. Christine Lyn Melgarejo, Veterinarian Quarantine Officer it Bureau of Animal Industry nga owa sigon raya gindeklara it mga pasahero sa andang mga bagahe ag nadiskubre eamang kat ginpaagi sa scanning it x-ray machine.
Ko Hunyo 7, ginsaksihan ni Provincial Veterinarian Dr. Mabel Siñel ag iba pang tawuhan it OPVET ro pagsunog sa mga nakumpiskang karne ag iba pang meat products ko nagtaliwan nga mga inadlaw sa Kalibo dump site.
